Jón Dan

JonDan.is

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

15.2.2010

Að tína peninga af trjám

Þegar börn gerast fram úr hófi bjartsýn er þeim gjarnan sagt að peningar vaxi ekki á trjám. Sjálfur hafði ég þetta lengi fyrir satt, en í seinni tíð er stundum farið að setja að mér efa. Í kvöld horfði ég á eftir svo sem hálfri millu af löggupeningum svífa út í buskann, líkt og þegar haustlauf trjánna fjúka út í veður og vind.

Þetta er svo sem ekkert nýtt. Það gerist í hvert sinn sem ég þarf að skreppa eitthvað á bílnum. Ég er sem sé í þeim tiltölulega fámenna hópi sem reyni að halda mig við löglegan hraða. Það er oft nokkuð snúið og krefst jafnvel töluverðrar þrjósku, vegna þess hversu augljóslega ég er fyrir í umferðinni og þar sem ekki eru tvær akreinar veldur þessi löghlýðni iðulega alvarlegum umferðartöfum.

Í kvöld skrapp ég héðan af Kleppsveginum alla leið til Hafnarfjarðar og hélt mig að venju sem næst þeim hraða sem upp er gefinn á skiltum. Það var auðvitað gáleysi að telja ekki bílana sem svifu fram úr, rétt eins og bílstjórarnir stæðu í þeirri trú að það væri lágmarkshraði sem tilgreindur er á hraðaskiltum. Þannig hefði ég getað reiknað nákvæmlega út hversu miklum peningum lögreglan tapaði á þessari stuttu vegalengd og þessum skamma tíma.

Eiginlega get ég illa tekið undir það að lögreglan sé fjársvelt. Hún þarf ekki annað en að gera út menn með viðeigandi mælitæki og innheimta hraðasektir. Og mannfæð er engin afsökun. Þessi tekjulind er nógu stór til að ráða bug á miklu atvinnuleysi.

Þetta er eiginlega jafn auðveld leið til að verða ríkur og að tína peninga af trjám. Og ég get ekki með nokkru móti vorkennt fólki sem ekki nennir að tína alvörupeninga af alvörupeningatrjám.

Hitt verður reyndar að viðurkennast að þessi augljósa gróðalind er ekki alveg ótæmandi. Vafalaust myndu margir fljótlega fara að passa sig. En um leið má gera ráð fyrir að umferðaslysum færi fækkandi og kannski mætti þá sjá aumur á löggunni og flytja til hennar eitthvað af þeim peningum sem spöruðust í heilbrigðiskerfi og útfararþjónustu.

Heitir þetta ekki að slá tvær flugur í einu höggi?

3 athugasemdir

Skrá athugasemd

16.02.10 00:03

Ragnar Eiríksson

Sektir við umferðalagabrotum renna í ríkissjóð og auka því ekki það fé sem lögreglan hefur til umráða það kostar sitt að fylgjast með þér og taka alla sem framúr þér fara fyrir of hraðan akstur!!!!
Það er hins vegar alveg rétt að fátítt er að sjá bíla á löglegum hraða í Stór-Reykjavík og sem utanbæjarmaður líður mér hálf illa í umferðinni þar!

Kveðja,
Ragnar Eiríksson

16.02.10 03:55

Jón Dan

Rétt Ragnar. Takk fyrir að virða þetta svars.

En sjáðu fyrir þér að allir yrðu sektaðir, bara um leið og þeir fara "verulega yfir hámarkshraða". Það er tæknilega vel mögulegt og m.a.s. tiltölulega ódýrt.

Geturðu ímyndað þér tekjurnar? Ég hef lengi verið þeirra skoðunar að umferðalögreglumenn ættu að vera á prósentum, svona rétt eins og margir sölumenn.

Að auki myndi jarðarförum ungs fólks kannski fækka - að ekki sé minnst á minnkað álag á gjörgæslu og svo endurhæfingu. Þá væri ekki til einskis barist.

16.02.10 04:02

Jón Dan

PS: Svo geri ég auðvitað ráð fyrir að sektartekjurnar yrðu "eyrnamerktar" lögreglunni.

Til baka