Ég er að upphafi sveitastrákur norðan úr Hrútafirði, tók landspróf í Reykjaskóla 1966 og varð stúdent frá MA 1970. Ég þvældist dálítið um í háskólum annað slagið fram yfir 1980, bæði á Íslandi og í Svíþjóð og fékk nokkra nasasjón af ýmsum greinum en lauk aldrei neinu lokaprófi.

Fyrstu árin eftir stúdentspróf starfaði ég við kennslu, vann á Amtsbókasafninu á Akureyri og var í sagnfræði og bókasafnsfræði við Háskóla Íslands í líklega einn og hálfan vetur. Fluttist til Svíþjóðar 1976, fyrst til Lundar, en ári síðar til Stokkhólms, þar sem ég lagði stund á stjórnsýslufræði og forritun í háskólanum. Á Stokkhólsmsárunum vann ég lengst af fyrir mér sem strætóbílstjóri og síðar leigubílstjóri.