Jón Daníelsson

Forsíða / Blogg Greinar & pistlar Myndir

Hver er maðurinn

Hafðu samband Skráning á póstlista

22.1.2010

Læknar yfir landamæri

Íslenskir læknar eru nú sagðir á flótta til útlanda vegna bágra launakjara hér heima og vaxandi fjöldi þeirra sem staddir eru í sérnámi erlendis hyggst ekki snúa aftur heim á íslenska láglaunasvæðið. Þetta má kannski út af fyrir sig flokka undir mannlega náttúru.

En heiðarlegt og sanngjarnt er það ekki. Það gleymist hér, að læknarnir eru ekki alls kostar skuldlausir við íslenska samfélagið. Ekki veit ég hve háum fjárhæðum ríkissjóður hefur kostað til menntunar þeirra en þar er örugglega meira en klínk á ferðinni.

Menntunina fá læknarnir sér að kostnaðarlausu, en teljast af einhverjum furðulegum ástæðum eiga hana skuldlausa að námi loknu. Og að sjálfsögðu gildir þetta um fleiri stéttir.

Það er ekki alveg sjálfsagt mál, að fólk geti fengið hér rándýrt háskólanám alveg gefins, aflað sér kannski dálítillar starfsreynslu, þakkað svo bara pent fyrir sig og nýtt þessa rándýru menntun í eigin þágu, þar sem mest er upp úr henni að hafa.

Væri kannski ráð að láta háskólanema skrifa undir skuldaviðurkenningu upp á raunverulegan kostnað við menntun þeirra. Skuldina mætti að námi loknu greiða upp með með því einu að starfa í faginu hérlendis í tiltekinn árafjölda. Ég er ekki í vafa um að þjóðhagfræðingar geti reiknað út hversu mörg þau ár þyrftu að vera.

Á hinn bóginn þarf ekki að binda fólk í neina átthagafjötra. Þeir sem fremur kjósa að starfa í útlöndum, geta einfaldlega tekið þann kost að borga skuld sína við íslenska þjóðarbúið í peningum.

Skrá athugasemd

Til baka

Umsjón og ábyrgð: Jón Daníelsson – Sími: 553 6118 – Veffang: www.jondan.is - Netfang: jondan[at]mmedia.is